مَرِّيتْ لِيْ عِدٍّ وطارتْ حمايْمَهْ

ودرتْ النظر فيما بقى من رسايْمَهْ

ووقَّفتْ عنده وقفةٍ ما هَقيْتها

وقفة بوابير على الموج عايْمَهْ

وذَعذَع هوى الغربي وكنِّيت عَبرتي

واشتبّ جُوفي ساع هبَّت نسايْمَهْ

ومِن غنَّت الوَرقا على جَال عِدّها

صاحت طواري بين الأضلاع نايْمَهْ

ورجعت بالذكرى لوقتٍ مضى لْنا

شريط ذكرى في خيالي وسايْمَهْ

وجيه شيبان وبني عَمّ وأصدقَا

ربعٍ لكسب الطيب والعزّ هايْمَهْ

وميَّلت راسي شرق وارخيتْ مسمعي

وا كنِّي أوحي صوتهم في قوايْمَهْ

هذاك مسجدهم وهذي ديارهُم

وهذي مناراتٍ على العزِّ دايْمَهْ

 يجذب سناها طرقيٍ ما عنَى لْها

في مجلس دايم تخالف كرايْمَهْ

تذبح منايحهم لواجب ضيوفهم

في قلِّ وقتٍ ما شكَوا من ثلايْمَهْ

وهنا مرابط كل أصيل معرَّبه

صفرٌ صوافن عن هل الهون زايْمَهْ

وهنا مفالي ذودهم في حدودهم 

عزّي لِمَنْ هُو طامع إنها قسايْمَهْ

وهنا وقف عودٍ رشيد وَبْدع لنا 

أبيات نصحٍ من فرايد غنايْمَهْ

وهناك بيّن كامل الوصف واتَّقى

والعين صدَّت منه والقلب رايْمَهْ

عدتني الشيمةْ والأخلاق والوفا

عن ما يهين النفس لو هي مهايْمَهْ

ومن الحيا والله ما عاد شفتها

عن الهون شمت وهِيْ عن الهون شايْمَهْ

قفَّت لياليهم وراحت سنينهم

اقْفاي عقبانٍ مع الجو حايْمَهْ

فلاني بَلُوم الوقت لا لامه الردي

ما لامه اللي طيباتٍ قدايْمَهْ

فلا غرَّنا قِبَّال الأيَّام والرَّخا

ولا ضرَّنا لو لحق جوره صرايْمَهْ

مضى دورهم لَوَّلْ ومنزلهم العلا

وجَا دورنا نحفظ مواريث قايْمَهْ

وحنَّا على العهد القديم ووصاتهم

نطبّ سوق الطيب لا زاد سايْمَهْ

فإنْ ما احتمينا دون صيتٍ يعزِّنا

فلا خير في رَجْلٍ تردَّت عزايْمَهْ