من فتح باب الحديث لكل عابر

جاه من بعض البشر ما لا يودَّهْ

يا نديمي ما يضيقنَّ المعابر 

واعرف إنِّ الهرج له جزره ومدَّهْ

لَيهْ ترخِّي حبل صوتك وانت خابر؟

المدى ما هو مدى طيرك تهدَّهْ

قبل ما تتعب ورى كشف المخابر 

كلِّ شيٍ ما ملَا عينك تعدَّهْ 

خلَّكْ أكبر كلِّ ما شفت المكابر 

يوم كلٍّ له من التفكير قدَّهْ 

كل ما هبَّتْ وشفتْ الجو غابر 

الهوا ما هو بشرط تصير ضدَّهْ 

لِيْ متى والرِّيح تصرخ وانت صابر؟

لا تسدِّ الباب كُلِّ البيت هِدَّهْ

الحسايف ما لها إلَّا قطع دابر 

خَلْها فِرقَةْ من أوَّلها وصِدَّه 

والهقاوي ما لِها غير المثابر 

وانت طيِّب والمواقف مستجدَّهْ

القبور الغاليةْ وسط المقابر 

ما بعد صارت نصايبها الأشدَّهْ 

وَإِنْ تمعَّنت الزَّمن في عين سابر 

كلِّ شيٍ لهْ مع الأيَّام حَدَّهْ

وإنْ خذل رأس القلم جود المحابر 

لا تلومَنِّ الوَرَق، وإنْ باحِ سِدَّهْ