مملكة السحر

 

شِايِف... كَأنّو في عَتِم

بلَحظَة... بِيصير نْهار

وْفِرسِان يِمشوا عَالنّهِر

وِخْيولهُن... وَقْت العَطَش

عَم تِشرَب مْنِ النّارْ!

 

سيوف البَرق بِتْدِقّ عَ دروع الوَقت

مَرَّة غَرب... مَرَّة شَرق 

صَوت الرَّعد أسرارْ!

 

شِايِف... كَأنّو في حلا بْتِمّ البَحِر

سِكَّر !

سِكَّر... مِتِل

قَعَد الشِّعر وِارتِاح بِقَلب السطر 

 

أهلا وسَهلا تْفَضَّلوا

فوتوا... عَمَملِكْةِ السِّحر

أحرارْ!

 

 

 

 

قهوة النسيِان 

 

مَشغول بالو كان

يِمْكِن عَ إبنو... أو على إمّو

وْحَسّ بْحَريقَة... ماشيِة بْدَمّو

حَتَّى القَهر

عَرْبَش... عَ وِجّو وْ بان

عَيَّط... لَمين بْيَعرِف مْنِ الجان

بَرْكي حَدا مِنُّن... بِيشَلُّحو هَمّو 

 

وْلمّا عِرِف إنّو الأَهل راحوا على البستان 

قَعَد وْطَلَب قَهوِي... مِنِ النسيان

وْقَرَّب... شفافو مْنيح عَالفِنجان

تا وِقْع... طَعْم الهَمّ.. مِن تمّو!

 

 

وينو؟

 

بِتنام عم تنطُر مَلاك المَوت

بِتفيق بعدَك ناطرو

وَينو؟

 

يمكن وصِل عَاللَّس... ما في صَوت

لَفّ وْ رِجع

وْخلّا مَسافِة... بينَك و بَينو

 

ويمكن فِقت حَدّو... ومَنّو مَطْرحَك 

مَدّيت إيدَك عَالعُمر لَتقوم

مَا قْدِرتْ...

ما بين إيدَك وِالعُمر

كانت... كَإنَّا واقفِة... عَينو!

 

بَوَّاب

 

المفتاح ضاع... تْسَكَّروا لِبوابْ

وحدي أنا... صاير... متل بوَّابْ

وِمْبَيّنِه...

مِتْل ال كإنَّا مْقَطّبِة شْبابيكها 

جُوَّا... الدِّنيْ

 

ما في نفَس

مشدود يا خَيط القُطَب 

برَّا... بَرِد 

وْجُوَّا الوَرِد

ماشي وْ لبِس ريحِةْ نِديْ

حتّى إذا انْقَلُّو: حلو 

فَتَّح رُطَب... دِغري هِديْ

مَا الناس عم تِهدي الدَّفا لَبَعْضها

وِبتِنْهِديْ...

تَيْضَلّ بردان الوَرِد

بَوَّاب عَ وْرود الأرض 

سهران برَّات الدِّنيْ!